गावठी पिस्तूल बाळगणाऱ्या दोघांच्या मुसक्या आवळल्या

दैनिक बातमीदार I १८ डिसेंबर २०२२ I बेकायदेशीररित्या गावठी बनावटीची पिस्तूल घेऊन फिरणाऱ्या दोघांना जळगाव शहरातील अजिंठा चौकातील हॉटेल महाराजासमोर शनिवारी १७ डिसेंबर रोजी सायंकाळी ६ वाजता एमआयडीसी पोलिसांनी अटक केली आहे. दोघांकडून २० हजार रुपये किंमतीची गावठी पिस्तूल हस्तगत केली आहे. याबाबत एमआयडीसी पोलीस ठाण्यात गुन्हा दाखल करण्यात आला आहे.

शहरातील अजिंठा चौकातील हॉटेल महाराजा परिसरात मध्यप्रदेशातील बऱ्हाणपूर येथील राहणारे दोन जण हे गावठी पिस्तूल घेऊन फिरत असल्याची गोपनीय माहिती एमआयडीसी पोलीस ठाण्याचे पोलीस निरीक्षक जयपाल हिरे यांना मिळाली. त्यानुसार त्यांनी पथकाला कारवाईच्या सूचना दिल्या, एमआयडीसी पोलीस कर्मचाऱ्यांनी सायंकाळी ६ वाजता अजिंठा चौकातील हॉटेल महाराजासमोर कारवाई करत संशयित आरोपी अक्षय प्रकाश घारू (वय-२१) आणि नितीन देवी दयाल सालवे (वय-२५) दोन्ही रा. शिवाजीनगर, बऱ्हाणपूर, मध्यप्रदेश यांना ताब्यात घेतले. त्यांच्याकडून २० हजार रुपये किमतीची गावठी बनावटीची पिस्तूल हस्तगत केली आहे. पोलीस नाईक विकास सातदिवे यांच्या फिर्यादीवरून एमआयडीसी पोलीस ठाण्यात गुन्हा दाखल करण्यात आला आहे. या गुन्ह्याचा पुढील तपास पोलीस हेडकॉन्स्टेबल रामकृष्ण पाटील करीत आहे.