वर्डी येथे ‘आदिवासी जनकल्याण विकास परिषद’चे मंत्री डॉ. अशोक वुईके यांच्या हस्ते होणार उद्घाटन

वर्डी येथे ‘आदिवासी जनकल्याण विकास परिषद’चे मंत्री डॉ. अशोक वुईके यांच्या हस्ते होणार उद्घाटन

जळगाव राज्याचे आदिवासी विकास मंत्री डॉ. अशोक वुईके मंगळवार, ३ मार्च २०२६ रोजी जळगाव जिल्ह्यातील चोपडा तालुक्याच्या दौऱ्यावर येत असून पारंपरिक होळी उत्सवात सहभाग घेणार आहेत. तसेच वर्डी (ता. चोपडा) येथे आयोजित ‘आदिवासी जनकल्याण विकास परिषदे’चे उद्घाटन त्यांच्या हस्ते होणार आहे.
दौऱ्यानुसार मंत्री वुईके सकाळी ७.३० वाजता शिरपूर येथून बोऱमळी (ता. चोपडा) येथे प्रयाण करतील. सकाळी ९ वाजता बोऱमळी येथे आगमनानंतर ते आदिवासी बांधवांच्या पारंपरिक होळी उत्सवात सहभागी होणार आहेत. आदिवासी संस्कृतीचा सन्मान व परंपरांशी नाळ दृढ करणे हा या सहभागाचा मुख्य उद्देश आहे.
दुपारी १२.३० वाजता वर्डी (ता. चोपडा) येथे आदिवासी विकास विभागातर्फे भव्य ‘आदिवासी विकास परिषद’ आयोजित करण्यात आली आहे. परिषदेत शासनाच्या विविध जनकल्याणकारी योजनांची माहिती आदिवासी घटकांपर्यंत पोहोचविण्यावर भर दिला जाणार आहे. सकाळी १० वाजल्यापासून विविध विकास कामांचे प्रदर्शन भरविण्यात येणार असून मंत्री वुईके यांची त्यास भेट देणार आहेत.

परिषदेत मंत्री वुईके आदिवासी बांधवांशी थेट संवाद साधून त्यांच्या समस्या, अपेक्षा व विकासविषयक मुद्द्यांवर चर्चा करणार आहेत. तसेच शिक्षण, आरोग्य, रस्ते, पिण्याचे पाणी, रोजगार यांसारख्या विषयांवर शासनाच्या योजनांची माहिती देण्यात येणार आहे.

दरम्यान, सकाळी ११.३० वाजता वर्डी येथे श्री समर्थ सुकनाथ बाबा संजीव समाधी मंदिर येथे पूजन कार्यक्रमास मंत्री वुईके उपस्थित राहणार आहेत. त्यानंतर आदिवासी विकास परिषदेचे उद्घाटन त्यांच्या हस्ते होणार आहे.

या सोहळ्यास केंद्रीय राज्यमंत्री रक्षा खडसे, जिल्ह्याचे पालकमंत्री गुलाबराव पाटील, जलसंपदा मंत्री गिरीश महाजन, वस्त्रोद्योग मंत्री संजय सावकारे, आदिवासी विकास राज्यमंत्री इंद्रनील नाईक, खासदार स्मिता वाघ, आमदार चंद्रकांत सोनवणे, आमदार अमोल जावळे यांच्यासह जिल्ह्यातील सर्व लोकप्रतिनिधी व अधिकारी उपस्थित राहणार आहेत.

जिल्ह्यातील आदिवासी बांधवांनी मोठ्या संख्येने उपस्थित राहावे, असे आवाहन यावल प्रकल्प अधिकारी अरुण पवार यांनी केले आहे.