संत ज्ञानेश्वर विद्यालयात ‘जंक फूड मुक्त होळी’चा अनोखा संदेश; आरोग्यदायी जीवनशैलीचा संकल्प

संत ज्ञानेश्वर विद्यालयात ‘जंक फूड मुक्त होळी’चा अनोखा संदेश; आरोग्यदायी जीवनशैलीचा संकल्प

​विद्यार्थ्यांनी केली जंक फूडची प्रतीकात्मक होळी; संतुलित आहाराचे महत्त्व पटवून देणारा अभिनव उपक्रम

​प्रतिनिधी जळगाव
जंक फूडच्या वाढत्या प्रभावामुळे तरुण पिढीच्या आरोग्यावर होणारे दुष्परिणाम लक्षात घेऊन, स्थानिक संत ज्ञानेश्वर विद्यालयात ‘जंक फूड मुक्त होळी’ हा सामाजिक संदेश देणारा एक अभिनव उपक्रम उत्साहात साजरा करण्यात आला.

पारंपारिक सणाला सामाजिक आणि आरोग्यविषयक जागृतीची जोड देत विद्यालयाने समाजासमोर एक वेगळा आदर्श उभा केला आहे.
​या अनोख्या होळीचे विधिवत पूजन मुख्याध्यापक मुकेश नाईक यांच्या हस्ते करण्यात आले. त्यानंतर इयत्ता दहावीच्या माजी विद्यार्थ्यांच्या हस्ते होळीचे दहन करण्यात आले. या उपक्रमाचे मुख्य आकर्षण म्हणजे विद्यार्थ्यांनी केवळ लाकडे किंवा कचरा न जाळता, शरीराला घातक ठरणाऱ्या ‘जंक फूड’ला प्रतीकात्मकरीत्या निरोप दिला. या माध्यमातून विद्यार्थ्यांनी जंक फूडचा त्याग करून आरोग्यदायी जीवनशैली स्वीकारण्याचा ठाम संकल्प केला.

​याप्रसंगी रूपाली आव्हाड मॅडम यांनी विद्यार्थ्यांना जंक फूडचे शरीरावर होणारे घातक परिणाम आणि त्यामुळे उद्भवणाऱ्या विविध शारीरिक समस्यांबाबत सविस्तर मार्गदर्शन केले. “बाहेरचे तेलकट आणि प्रक्रिया केलेले पदार्थ खाण्यापेक्षा घरगुती पौष्टिक पदार्थ आणि संतुलित आहाराला प्राधान्य द्या,” असे आवाहन त्यांनी केले. तसेच नियमित व्यायाम आणि सकस आहाराचे महत्त्व त्यांनी पटवून दिले.

​‘आरोग्यदायी होळी, आनंदी होळी’ हा मूलमंत्र सर्वत्र पोहोचवण्यासाठी राबवण्यात आलेल्या या उपक्रमाचे पालकांनी आणि शिक्षण क्षेत्रातून कौतुक होत आहे. या उपक्रमामुळे विद्यार्थ्यांमध्ये आरोग्याबाबत मोठी जागरूकता निर्माण झाली असून, सण साजरे करताना सामाजिक भान कसे जपावे, याचा वस्तुपाठ विद्यालयाने घालून दिला आहे.