पशुसंवर्धन विभागाकडून विविध वैयक्तिक लाभाच्या योजनांसाठी अर्ज करण्याचे आवाहन

पशुसंवर्धन विभागाकडून विविध वैयक्तिक लाभाच्या योजनांसाठी अर्ज करण्याचे आवाहन

जळगाव  – ग्रामीण भागातील पशुपालक आणि शेतकरी बांधवांसाठी महत्वाची बातमी आहे. पशुसंवर्धन विभागाच्या वतीने सन 2025-2026 या वर्षांसाठी राज्यस्तरीय नावीण्यपूर्ण योजना व जिल्हास्तरीय योजनेंतर्गत वैयक्तिक लाभाच्या योजनेसाठी पात्र पशुपालक, शेतकरी, सुशिक्षित बेरोजगार युवक, युवती व महिलांनी ऑनलाईन पद्धतीने 2 जून, 2025 पर्यंत अर्ज सादर करण्याचे असे आवाहन पशुसंवर्धन विभागामार्फेत प्रसिद्धी पत्रकान्वये केले आहे.
नाविण्यपूर्ण राज्यस्तरीय व जिल्हास्तरीय योजनेंतर्गत दुधाळ गायी, म्हशीचे गट वाटप करणे, शेळी, मेंढी गट वाटप करणे, 1 हजार कुक्कुट मांसल पक्ष्यांच्या संगोपनासाठी निवारा शेड उभारणीसाठी अर्थसाहाय्य देणे, 100 कुक्कुट पिलांचे वाटप करणे तसेच 25+3 तलंगा गट वाटपासाठी लाभार्थ्यांची निवड ऑनलाईन पद्धतीने करण्यात येणार आहे. जिल्हास्तरीय योजनांसाठी संगणक प्रणाली लागू करण्यात आली असून लाभार्थ्यांने एखाद्या योजनेकरिता ऑनलाईन अर्ज केल्यानंतर त्यास दरवर्षी पुन्हा अर्ज करावा लागू नये, यासाठी तयार केलेली प्रतिक्षायादी सन 2021-2022 पासून पुढील 5 वर्षांपर्यत म्हणजे सन 2025-2026 लागू राहणार आहे.
पशुपालकांना डेअरी, पोल्ट्री किंवा शेळीपालनापैकी ज्या योजनेसाठी अर्ज करावयाचा आहे, ती निवड करण्याची सुविधा, अर्ज व योजनांची संपूर्ण माहिती https://ah.mahabms.com संकेतस्थळावर तसेच अँड्रॉईड मोबाईलवर AH-MAHABMS गुगल प्ले-स्टोअरवर उपलब्ध करुन देण्यात आली आहे. या योजनेसाठी अर्ज फक्त ऑनलाईन पध्दतीने स्वीकारण्यात येणार आहे.
अर्ज भरताना अर्जदाराने नोंदविलेल्या मोबाईल क्रमांकावर अर्जाच्या स्थितीबाबत संदेश पाठविण्यात येणार असल्याने अर्जदाराने मोबाईल क्रमांकात बदल करू नये. तसेच मागील वर्षी अर्ज केलेल्या अर्जदारांनी पुन्हा अर्ज करावयाची आवश्यकता नाही.
योजनेबाबत अधिक माहितीसाठी टोल फ्री क्रमांक 1962 किंवा तालुक्याचे पशुधन विकास अधिकारी (विस्तार), पंचायत समिती, जिल्हा पशुसंवर्धन अधिकारी अथवा जिल्हा पशुसंवर्धन उपआयुक्त कार्यालय, तालुका लघु पशुवैद्यकीय सर्व चिकित्सालय अथवा नजीकच्या पशुवैद्यकीय केंद्रावर संपर्क साधावा. असे आवाहन पशुसंवर्धन विभागामार्फेत करण्यात आले आहे.
त्यानुसार, नाविन्यपूर्ण राज्यस्तरीय व जिल्हास्तरीय योजनेंतर्गत दुधाळ गाई-म्हशी गट वाटप करणे, शेळी-मेंढी गट वाटप करणे, १००० मांसल कुक्कुट पक्ष्यांचा संगोपनशेड उभारणीस अर्थसहाय्य करणे, १०० कुक्कुट पिलांचे वाटप व २५ + ३ तलंगा गट वाटप या योजनांसाठी ऑनलाईन अर्ज मागविण्यात येत आहेत. पशुधनाच्या डेअरी, पोल्ट्री किंवा शेळीपालन यापैकी ज्या बाबींमध्ये अर्ज करावयाचा आहे, त्याची निवड करण्याची सुविधा देखील उपलब्ध करून देण्यात आली आहे. राज्यातील पशुपालक/शेतकरी बांधव, सुशिक्षित बेरोजगार युवक / युवती व महिलांनी या योजनांचा लाभ घेण्यासाठी ऑनलाईन पद्धतीने अर्ज दाखल करण्याचे आवाहन पशुसंवर्धन विभागामार्फत करण्यात येत आहे.