गावठी कट्टा आणि कोयत्यासह दहशत माजविण्याचा डाव उधळला; जळगावात दोघांना अटक

गावठी कट्टा आणि कोयत्यासह दहशत माजविण्याचा डाव उधळला; जळगावात दोघांना अटक

​एमआयडीसी पोलिसांची धडक कारवाई; ७० हजारांच्या शस्त्रसाठ्यासह दुचाकी जप्त

​जळगाव | प्रतिनिधी

शहरातील कासमावाडी परिसरात गावठी कट्टा आणि धारदार कोयता घेऊन दहशत माजविण्याच्या उद्देशाने फिरणाऱ्या दोन संशयितांना एमआयडीसी पोलिसांनी शिताफीने अटक केली आहे. डॉ. बाबासाहेब आंबेडकर जयंतीच्या पार्श्वभूमीवर पोलिसांनी ही सतर्कता दाखवत मोठा अनर्थ टाळला असून, संशयितांविरुद्ध भारतीय शस्त्र कायद्यानुसार गुन्हा दाखल करण्यात आला आहे.

​गोपनीय माहितीवरून रचला सापळा

​दिनांक १४ एप्रिल रोजी एमआयडीसी पोलीस ठाण्याचे पोलीस निरीक्षक बबन आव्हाड यांना कासमावाडी परिसरात काही तरुण घातक शस्त्रांसह फिरत असल्याची गोपनीय माहिती मिळाली होती. या माहितीची गांभीर्याने दखल घेत गुन्हे शोध पथकाला तत्काळ कारवाईचे आदेश देण्यात आले. सहाय्यक पोलीस निरीक्षक राहुल तायडे आणि चंद्रकांत धनके यांच्यासह पथकाने कासमावाडी व नेरी नाका परिसरात सापळा रचला. यावेळी एकता चौकाजवळ दुचाकीवरून येणाऱ्या दोन संशयितांना पोलिसांनी थांबण्याचा इशारा केला, मात्र त्यांनी पळ काढण्याचा प्रयत्न केला. पोलिसांनी पाठलाग करून त्यांना ताब्यात घेतले.

​झडतीमध्ये आढळला शस्त्रसाठा

​ताब्यात घेतलेल्या संशयितांची झडती घेतली असता, एकाच्या कमरेला गावठी कट्टा तर दुसऱ्याकडे धारदार लोखंडी कोयता आणि कट्ट्याचे रिकामे मॅगझीन मिळून आले. पोलिसांनी ७० हजार ५०० रुपये किमतीचा मुद्देमाल जप्त केला आहे. यामध्ये गावठी कट्टा, कोयता आणि दुचाकीचा समावेश आहे. पोलीस चौकशीत या आरोपींची नावे रोहित गोपाळ कुंवर (वय २२, रा. कासमावाडी) आणि सागर रामा सोनवणे (वय २१, रा. आसोदा रोड, जळगाव) अशी निष्पन्न झाली आहे.

​पोलीस कोठडीत रवानगी

​दोन्ही आरोपींना न्यायालयात हजर केले असता, त्यांना एक दिवसाची पोलीस कोठडी सुनावण्यात आली आहे. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली पूर्ण करण्यात आली. या घटनेचा पुढील तपास पोलीस हवालदार किरण चौधरी व योगेश घुगे करीत आहेत.