अल्पवयीन मुलींच्या अपहरणप्रकरणी दोन आरोपी जेरबंद

अल्पवयीन मुलींच्या अपहरणप्रकरणी दोन आरोपी जेरबंद

भुसावळ-रावेरमध्ये पोलिसांची कारवाई; पोक्सो अंतर्गत गुन्हे दाखल

भुसावळ : शहरातील अल्पवयीन मुलगी बेपत्ता झाल्यानंतर बाजारपेठ पोलिसांनी तातडीने हालचाल करत मुलीसह संशयित आरोपी अमोल किसनराव निंदाणे (वय २८) याला अटक केली आहे. पीडित मुलीच्या जबाबावरून आरोपीविरुद्ध अत्याचाराचा गुन्हा नोंदविण्यात आला असून न्यायालयाने त्याला ६ एप्रिलपर्यंत पोलिस कोठडी सुनावली आहे.

या प्रकरणाचा तपास विभागीय पोलिस अधिकारी केदार बारबोले आणि पोलिस निरीक्षक राहुल वाघ यांच्या मार्गदर्शनाखाली सुरू होता. बाजारपेठ पोलिस ठाण्याच्या गुन्हे प्रकटीकरण शाखेच्या पथकाने विशेष शोधमोहीम राबवत मुलीचा ठावठिकाणा लावला व तिला सुरक्षित ताब्यात घेतले. प्राथमिक तपासात आरोपीने मुलीला फूस लावून पळवून नेल्याचे व तिच्यावर अत्याचार केल्याचा आरोप असल्याचे पोलिसांनी सांगितले.

रावेरमध्येही  कारवाई

दरम्यान, रावेर तालुक्यातील आणखी एका प्रकरणात पोलिसांनी शुभम अनिल पाटील (वय २१, रा. खिरोदा) याला अटक केली आहे. १५ वर्षीय मुलीला फूस लावून पळवून नेल्याप्रकरणी त्याला मध्य प्रदेशातील भिकनगाव येथून ताब्यात घेण्यात आले. २८ मार्च रोजी मुलगी बेपत्ता झाल्याची फिर्याद दाखल झाल्यानंतर पोलिसांनी गुन्हा नोंदवून तपास सुरू केला होता.
दोन्ही आरोपींना न्यायालयात हजर करण्यात आले असून विशेष पोक्सो न्यायालयाने त्यांना पोलिस कोठडी सुनावली आहे. या सलग घटनांमुळे परिसरात खळबळ उडाली असून पोलिसांकडून पुढील तपास सुरू आहे.