मजुराची राहत्या घरात गळफास घेऊन आत्महत्या

मजुराची राहत्या घरात गळफास घेऊन आत्महत्या

नांद्रा बुद्रुकमध्ये घटना; अकस्मात मृत्यूची नोंद

जळगाव : तालुक्यातील नांद्रा बुद्रुक येथे राहत्या घरात गळफास घेऊन एका प्रौढाने जीवन संपविल्याची दुर्दैवी घटना उघडकीस आली आहे. या घटनेमुळे परिसरात हळहळ व्यक्त केली जात आहे.

रघुनाथ शंकर सोनवणे (वय ५५, रा. नांद्रा बुद्रुक, ता. जळगाव) असे मृत व्यक्तीचे नाव असून ते मजुरी करून कुटुंबाचा उदरनिर्वाह करत होते. शनिवार, दि. ४ एप्रिल रोजी ते घरात एकटे असताना त्यांनी गळफास घेत आत्महत्या केली.

काही वेळाने त्यांचे भाऊ घरी परतले असता सोनवणे हे गळफास घेतलेल्या अवस्थेत आढळले. त्यांना तातडीने शासकीय वैद्यकीय महाविद्यालय व रुग्णालयात दाखल करण्यात आले; मात्र वैद्यकीय अधिकाऱ्यांनी त्यांना मृत घोषित केले.

या प्रकरणी तालुका पोलिस ठाण्यात अकस्मात मृत्यूची नोंद करण्यात आली असून पुढील तपास पोहेकॉ दिनेश चव्हाण करीत आहेत.