मोठी बातमी : ग्रामपंचायत निवडणुकांसाठी अर्ज सादर करण्याच्या वेळेत वाढ !

बातमीदार | १८ ऑक्टोबर २०२३

राज्यातील ग्रामपंचायत निवडणुकांसाठी उर्वरित कालावधीत म्हणजे २० ऑक्टोबर २०२३ पर्यंत नामनिर्देशनपत्र (अर्ज) सादर करण्याची वेळ दुपारी ३ ऐवजी सायंकाळी ५.३० वाजेपर्यंत वाढवण्यात आली आहे, असे राज्य निवडणूक आयोगाकडून कळवण्यात आले आहे.

राज्यभरातील सुमारे २ हजार ३५९ ग्रामपंचायतींच्या सार्वत्रिक निवडणुकांसाठी आणि २ हजार ९५० सदस्यपदांच्या, तर १३० सरपंचपदांच्या रिक्त जागांसाठी पोटनिवडणूक ५ नोव्हेंबर रोजी मतदान होणार असल्याची घोषणा राज्य निवडणूक आयोगाकडून ३ ऑक्टोबर रोजी करण्यात आली होती. त्यानुसार नामनिर्देशनपत्रे १६ ते २० ऑक्टोबर या कालावधीत सकाळी ११ ते दुपारी ३ या वेळेत दाखल करण्याची मुदत देण्यात आली होती. नामनिर्देशनपत्रासोबत सादर करावयाचे घोषणापत्र संगणक प्रणालीद्वारे भरले जात होते, मात्र त्याची प्रिंट काढतांना तांत्रिक अडचणी येत असल्याच्या तक्रारी आयोगाकडे प्राप्त झाल्या होत्या.

त्या अडचणी आता दूर करण्यात आल्या आहेत. त्यामुळे नामनिर्देशनपत्र सादर करण्याच्या उर्वरित २० ऑक्टोबर या कालावधीतील मुदत सकाळी ११ ते दुपारी ३ ऐवजी आता सकाळी ११ ते सायंकाळी ५.३० अशी करण्यात आली आहे.. अन्य प्रक्रिया पूर्व घोषित कार्यक्रमाप्रमाणे पार पडेल. मतदान ५ नोव्हेंबर रोजी होईल, असे आयोगाच्या निवेदनात म्हटले आहे.