नाशिकनंतर पुण्यात चालत्या बसला आग

दै. बातमीदार । १२ ऑक्टोबर २०२२ । प्रवाशांनी भरलेली एक खासगी बस पेटली. या बसमधून २६ प्रवासी प्रवास करत होते. या आगीमध्ये ही बस पूर्णपणे जळून खाक झाली असून सुदैवाने या घटनेमध्ये कोणताही जीवितहानी झाली नाही. मात्र भरस्त्यातच या बसने पेट घेतल्यामुळे परिसरात एकच खळबळ उडाली होती. हि घटना बस पुणे जिल्ह्यात घडली असल्याचे समजते.  MH 05 DK 9699 क्रमांकांची ही बस होती. नाशिकमधील बस दुर्घटनेची घटना ताजी असतानाच पुण्यातील हि घटना समोर आली आहे.

घोडेगाव जवळ पिंपळगाव घोडे गावच्या हद्दीत भिवंडी येथून श्री क्षेत्र भीमाशंकरकडे निघालेल्या महिलांच्या बसला आग लागून संपूर्ण बस खाक झाली. भिवंडी पाये गावातील 26 महिला रात्री अकरा वाजता भीमाशंकरकडे निघाल्या होत्या. आज सकाळी साडेसहाच्या सुमारास घोडेगावच्या पुढे गाडी आली असता बाजूने जाणाऱ्या एसटी बसच्या ड्रायव्हरने गाडीतून धूर निघत असल्याचे गाडी चालकाला सांगितले. चालकाने गाडी बाजूला लावली असता गाडीने खालून पेट घेतल्याचे दिसून आले त्यानंतर सर्व महिला गाडीतून तातडीने उतरल्या काही क्षणात संपूर्ण बस जळू लागली. हळूहळू संपूर्ण बस जळून खाक झाली.

दरम्यान, या बसला नेमकी आग कशामुळे लागली, हे अद्याप कळू शकलेलं नाही. शॉर्ट सर्टिकमुळे या बसने पेट घेतला असावा, अशी शंका व्यक्त केली जात आहे. आगीमुळे बसचे मोठ्या प्रमाणावर नुकसान झाले आहे. बसमध्ये आग लागलेली दिसताच प्रवाशांना तातडीने खाली उतरवण्यात आल्यामुळं मोठा अनर्थ टळला. या अपघातामध्ये कोणतीही जीवितहानी झाली नाही.