![](https://ebatmidar.com/wp-content/uploads/2023/10/Batmidar-3-26.jpg)
भारतीय नौदलाच्या आठ माजी अधिकाऱ्यांना फाशीची शिक्षा
बातमीदार | २७ ऑक्टोबर २०२३
इस्रायलसाठी हेरगिरी केल्याच्या आरोपाखाली भारतीय नौदलाच्या आठ माजी अधिकाऱ्यांना कतारमधील न्यायालयाने मृत्युदंडाची शिक्षा सुनावली. या निकालामुळे भारतातून संतप्त प्रतिक्रिया उमटत असून, परराष्ट्र मंत्रालयाने ‘धक्कादायक’ अशा शब्दांत त्याबाबत प्रतिक्रिया व्यक्त केली आहे.
कॅप्टन नवतेजसिंह गिल, कॅप्टन सौरभ वसिष्ठ, कॅप्टन बीरेंद्र कुमार वर्मा, कमांडर पूर्णेदू तिवारी, कमांडर सुगुणाकर पकाला, कमांडर संजीव गुप्ता, कमांडर अमित नागपाल व खलाशी रागेश अशी त्यांची नावे आहेत. एकेकाळी भारतीय नौदलातील महत्त्वाच्या युद्ध नौकांवर कर्तव्य बजावलेले हे अधिकारी ‘दाहरा ग्लोबल टेक्नॉलॉजिज अँड कन्सल्टन्सी सर्व्हिसेस’ या खासगी कंपनीसाठी काम करत होते. कतारच्या लष्करास प्रशिक्षण तसेच अन्य सेवा पुरवण्याचे काम ही कंपनी करते. सूत्रांनी दिलेल्या माहितीनुसार, इटालियन तंत्रज्ञानावर आधारित मिडगेट पाणबुडीसारख्या अत्यंत संवेदनशील अशा प्रकल्पावर त्यातील काही जण काम करत होते. ऑगस्ट २०२२ मध्ये त्यांना इस्त्रायलसाठी हेरगिरी केल्याच्या आरोपाखाली तुरुंगात डांबण्यात आले. मार्चमध्ये त्यांच्यावरील खटल्याच्या कार्यवाहीस सुरुवात झाली. गुरुवारी त्यांना फाशीची शिक्षा सुनावण्यात आली.
![Jain advt](https://ebatmidar.com/wp-content/uploads/2022/08/IMG_1987.jpg)
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम