अजितदादांना अध्यक्ष पद देणे म्हणजे चुकीचे ; माजी मंत्र्यांचा दावा !

दै. बातमीदार । ४ मे २०२३ ।  गेल्या २ मे पासून शरद पवारांनी राजीनामा देण्याचे विधान केल्यानंतर राज्यातील राजकारणात अनेक टीका टिपण्णीला सुरुवात झाली आहे तर दुसरीकडे आता अजित पवारांचे नाव अध्यक्ष पदासाठी चर्चेत आले असता, कार्यकर्ते मात्र आक्रमक झाल्याचे दिसत आहे. यावर माजी मंत्री शालिनी पाटील यांनी थेट अजित पवारांवर टीका केली आहे.

अजित पवार घोटाळेबाज आणि वेगवेगळ्या गुन्ह्यांत अडकलेले नेते आहेत. त्यांना कधीही अटक होऊ शकते. त्यामुळे त्यांना राष्ट्रवादी काँग्रेसचे अध्यक्षपद देणे चुकीचे ठरेल, असा दावा महाराष्ट्राचे माजी दिवंगत मुख्यमंत्री वसंतदादा पाटील यांच्या पत्नी माजी मंत्री शालिनीताई पाटील यांनी अजित पवार यांच्यावर हल्लाबोल करताना केला आहे.

63 वर्षे संसदीय राजकारणात ‘अजिंक्य’ राहिलेले 83 वर्षीय माजी केंद्रीय मंत्री शरद पवार यांनी मंगळवारी राजकारणातून निवृत्तीची घोषणा केली. राष्ट्रवादीचे अध्यक्षपदही सोडणार असल्याचे त्यांनी जाहीर केले. तसेच नवा अध्यक्ष निवडीसाठी त्यांनी समितीही जाहीर केली. ‘लोक माझे सांगती’ या आत्मचरित्राच्या दुसऱ्या आवृत्तीच्या प्रकाशन कार्यक्रमात पवारांनी ही घोषणा करताच सर्वांना धक्काच बसला. शरद पवार यांनी राजकारणातून निवृत्तीची घोषणा केल्यानंतर एकच हल्लाकल्लोळ माजला. मात्र शरद पवार अजूनही आपल्या निर्णयावर ठाम आहेत. शरद पवारांनंतर कोण असा प्रश्न आता निर्माण झाला आहे. अजितदादा कि सुप्रियाताई? राजकीय क्षेत्रातून यावर प्रतिक्रिया उमटत आहेत. आता माजी मंत्री शालिनीताई पाटील यांनी राष्ट्रवादी काँग्रेसच्या अंतर्गत कलहावर बोट ठेवले आहे. अजित पवार कसे अक्ष्यक्ष होण्यास सक्षम नाहीत याबाबत त्यांनी अजित पवारांचे नाव घेत थेट टीका केली आहे. शरद पवार यांच्या कट्टर राजकीय विराेधक म्हणून माजी मंत्री शालिनीताई पाटील या ओळखल्या जातात

शालिनीताई पाटील एका वृत्तवाहिनीशी बोलताना म्हणाल्या, शरद पवारांच्या आमदारांचे म्हणणे आहे की असे अचानक निघून जाणे चुकीचे आहे. योग्य पर्याय जोपर्यंत समोर येत नाही तोपर्यंत शरद पवारांनी निवृत्ती घेऊ नये. हा निर्णय त्यांनी घाईत घेतला आहे. मी आज 90 वर्षांची आहे. तरी लोक मला निवृत्ती घेऊ देत नाही. शरद पवार तर माझ्यापेक्षा 10 वर्षांनी लहान आहेत, असे म्हणत शालिनीताईंनी शरद पवारांना ज्येष्ठतेचा सल्ला दिला.