देशात पावसाचा हाहाकार सुरूच !

बातमीदार | ३० जुलै २०२३ | यंदाच्या पावसाळ्यात देशातील अनेक राज्यांमध्ये मोठ्या प्रमाणात हाहाकार माजला असून हिमाचल प्रदेशात आतापर्यंत १८७ जणांना आपला जीव गमवावा लागला आहे. हे सर्व सुरु असतांना तेलंगणामध्ये एका आठवड्यात १८ लोकांचा मृत्यू झाला आहे. तेलंगणातील सुमारे 12,000 लोकांना मदत छावण्यांमध्ये हलवण्यात आले आहे.

जम्मू-काश्मीरमधील गंदरबल जिल्ह्यातील एका गावात शनिवारी ढगफुटी झाली. त्यामुळे सात घरे, एक मशीद आणि दोन शाळांचे नुकसान झाले. उधमपूरमध्ये अचानक आलेल्या पुरामुळे नाल्यावरील फूटब्रिज तुटला. दिल्ली, पंजाब, हिमाचल आणि चंदीगड या उत्तर भारतीय राज्यांपाठोपाठ पूर्वेकडील राज्यांमध्ये मुसळधार पावसाची शक्यता आहे. 6 राज्यांमध्ये पुढील पाच दिवस मुसळधार पावसाचा इशारा देण्यात आला आहे. 29, 30 आणि 31 जुलै रोजी उत्तर प्रदेश, बिहार, झारखंड, छत्तीसगड, पश्चिम बंगाल आणि मध्य प्रदेशात मुसळधार पावसाची शक्यता आहे. तसेच ऑगस्टच्या पहिल्या आठवड्यात पूर्वेकडील राज्यांतील दुष्काळापासूनही दिलासा मिळेल. या राज्यांमध्ये मुसळधार पाऊस पडेल: हिमाचल, महाराष्ट्र, उत्तराखंड, उत्तर प्रदेश, राजस्थान, मध्य प्रदेश, बिहार, झारखंड, गोवा, छत्तीसगड, ओडिशा, पश्चिम बंगाल, आसाम, अरुणाचल प्रदेश. पावसाची शक्यता नाही: जम्मू-काश्मीर, पंजाब, हरियाणा, पश्चिम राजस्थान, गुजरात, कर्नाटक, आंध्र प्रदेश, केरळ, तामिळनाडूमध्ये पावसाची शक्यता नाही.