राज्यात थंडी पुन्हा धरणार जोर !

दै. बातमीदार । २६ जानेवारी २०२३ । राज्यातील काही भागात मोठ्या प्रमाणात थंडीचा कडाका सुरु होता पण गेल्या दोन दिवसापासून हा कडाका कमी झालेला जाणवू जरी लागला असला तरी या पुढील आठवड्यात थंडीची लाट येणार असल्याची माहिती तज्ज्ञ वर्तवू लागले आहे. आज आणि उद्या मराठवाडा, विदर्भ आणि मध्य महाराष्ट्रात पावसाची शक्यता वर्तवण्यात आली आहे. गेल्या काही दिवसांपासून राज्यात थंडीमध्ये चढउतार सुरू आहे. हा हवामान बदलाचा फटका असल्याचे तज्ज्ञ म्हणत आहेत.

राज्यात सध्या थंडीचा कडाका वाढत आहे. यात पुढच्या आठवड्यात अजून जास्त वाढ होण्याचा अंदाज हवामान विभागाने वर्तवला आहे. साधरणतः 29 जानेवारी ते 2 फेब्रुवारीपर्यंत राज्यात थंडीची लाट येणारय. येणाऱ्या काळात जम्मू-काश्मीर, उत्तराखंड, हिमाचल प्रदेशमध्ये बर्फवृष्टीचा अंदाज आहे. त्यामुळे महाराष्ट्रातले तापमान कमी होऊन थंडी वाढण्याची शक्यता आहे.

मध्य, पूर्व, उत्तर-पश्चिम भारतात वाऱ्यांनी दिशा बदलली आहे. ढगांच्या हालचाली वाढल्यात. त्यामुळे तापमानात वाढ झाली होती. मात्र, आता या ठिकाणी अनेक भागात बर्फवृष्टी होणार आहे. त्यामुळे उद्यापासून तापमानात घट होण्याचा अंदाज आहे. 29 ते 30 जानेवारी दरम्यान बर्फवृष्टी वाढण्याची शक्यताय. त्यामुळे महिन्याच्या शेवटी तापमान अजून खाली येण्याचा अंदाज आहे. उत्तरेत सलग येणाऱ्या पश्चिमी चक्रवातामुळे वातावरणात बदल होत असून गुरुवारी मराठवाडा, विदर्भासह मध्य महाराष्ट्रात ढगाळ वातावरणासह हलक्या स्वरूपाच्या पावसाचा अंदाज आहे. मंगळवारी मराठवाड्यातील काही भागात हलक्या स्वरूपाचा पाऊस झाला. बहुतांश भागात हरभरा व गव्हाचे पीक मध्यावर आले असतानाच अवकाळी पाऊस होतोय. यामुळे कांदा पिकावर रोगाच्या प्रादुर्भावाची शक्यताय.