सायबर सुरक्षेबाबत विद्यार्थ्यांना मार्गदर्शन; सरस्वती विद्यालयात जनजागृती सत्र

जळगाव : सरस्वती माध्यमिक विद्यालय, जळगाव येथे इयत्ता ८ वी ते १० वीच्या विद्यार्थ्यांसाठी सायबर सुरक्षा जनजागृती विषयावर विशेष मार्गदर्शन व चर्चासत्र आयोजित करण्यात आले. शुक्रवार, दि. ७ ऑगस्ट २०२६ रोजी दुपारी १२ ते १ या वेळेत हे सत्र पार पडले.

या वेळी प्रियदर्शनी भांडारकर आणि खुशबू लांबोळे यांनी विद्यार्थ्यांना सायबर सुरक्षेबाबत मार्गदर्शन केले. ऑनलाइन फसवणूक, फिशिंग, विशिंग, स्मिशिंग, ओटीपी व पासवर्ड सुरक्षितता, मजबूत पासवर्ड, 2-Factor Authentication, सोशल मीडियाचा सुरक्षित वापर तसेच बनावट लिंक आणि QR कोड स्कॅमपासून सावध राहण्याबाबत विद्यार्थ्यांना माहिती देण्यात आली.

तसेच सायबर बुलिंग, डिजिटल गोपनीयता, अनोळखी व्यक्तींशी ऑनलाइन संपर्क टाळणे, मोबाईल अॅप्स डाउनलोड करताना घ्यावयाची काळजी आणि सायबर गुन्ह्यांपासून बचावाचे उपाय याबाबतही सविस्तर मार्गदर्शन करण्यात आले.

संवादात्मक पद्धतीने झालेल्या या सत्राला विद्यार्थ्यांचा उत्स्फूर्त प्रतिसाद मिळाला. विद्यार्थ्यांनी विविध प्रश्न विचारून सायबर सुरक्षेबाबत माहिती जाणून घेतली. ऑनलाइन व्यवहार करताना सतर्क राहण्यासोबतच सुरक्षित डिजिटल जीवनशैलीचा अवलंब करण्याचा संकल्प विद्यार्थ्यांनी केला.

या उपक्रमासाठी विद्यालयाच्या मुख्याध्यापिका सौ. दिपाली पाटील तसेच सर्व शिक्षक व शिक्षकेतर कर्मचाऱ्यांचे सहकार्य लाभले.