ठाकरे गटात येण्यापुर्वीच राष्ट्रवादीच्या माजी आमदारांना एसीबीची नोटीस !

दै. बातमीदार । १४ फेब्रुवारी २०२३ । राज्यातील राजकारणात अनेक नेत्यांना एसीबी व ईडीची कारवाईची धाक दाखवीत अनेक पक्ष आपल्या पक्षात प्रवेश करण्याचा दबाव आणत असल्याचा दबावतंत्र वापरत आहे. तर नुकतेच राष्ट्रवादीचे माजी आमदार ठाकरे गटात येण्यापुर्वीच त्यांना एसीबीने नोटीस दिली आहे.

दापोली – खेड- मंडणगडचे राष्ट्रवादीचे माजी आमदार संजय कदम यांना एसीबीची नोटीस बजावण्यात आली आहे. 2014 ते 2019 या कालावधीत आमदार म्हणून असताना स्वतःच्या इमारती, क्रेशर उभारल्याचा आरोप त्यांच्यावर ठेवण्यात आला आहे. याची चौकशी करण्यासाठी नोटीस पाठवण्यात आल्याची माहिती आहे. दरम्यान, ठाकरे गटात दाखल होण्याआधीच त्यांना चौकशीसाठी बोलावण्यात आले आहे.

शिवसेनेचे विद्यमान आमदार योगेश कदम हे शिंदे गटात दाखल झाल्याने ठाकरे गटाकडून संजय कदम यांना पुन्हा शिवसेनेत आणण्याच्या हालचाली सुरु झाल्या आहेत. याबाबतची चर्चाही ऐकायला मिळत होती. ते लवकरच उद्धव ठाकरे यांच्या शिवसेनेत प्रवेश करणार असतानाच त्यांना ही नोटीस बाजवण्यात आल्याने आश्चर्य व्यक्त केले जात आहे.
बाळासाहेबांची शिवसेना पक्षाचे नेते रामदास कदम आणि आमदार योगेश कदम यांचे कट्टर विरोधक म्हणून माजी आमदार संजय कदम यांना ओळखले जातात. त्यांना आता एसीबीची नोटीस निघाल्याने दापोली मंडणगड विधानसभा मतदार संघात पुन्हा एकदा राजकीय क्षेत्रात खळबळ उडाली आहे. तसेच याआधी कोकणातील राजापूरचे आमदार राजन साळवी आणि सावंतवाडीचे आमदार वैभव नाईक यांचीही चौकशी करण्यात येत आहे. दरम्यान, राजन साळवी यांच्या पीएचीही चौकशी करण्यासाठी नोटीस पाठविण्यात आल्याची माहिती आहे. आमदार राजन साळवी यांची याआधी सलग सहा तास चौकशी करण्यात आली. सहा तासानंतर आमदार राजन साळवी एसीबी कार्यालयातून बाहेर पडले. त्यानंतरही पुन्हा एसीबी अलिबाग कार्यालयात हजर राहण्याची सूचना करण्यात आली होती. आपल्याला कितीही वेळा बोलावले तरी चौकशीसाठी हजर राहणार आहोत. संपूर्ण कुटुंबाची चौकशी केली तरीही तयार आहोत. माझ्याजवळ संबध नसलेल्या मालमत्तेची देखील एसीबी चौकशी करत आहे. तसेच एसीबीने मागवलेली आणखी माहिती सादर करणार आहोत, असे सांगत साळवी म्हणाले, पक्षप्रमुख उध्दव ठाकरे यांच्यासह संपूर्ण शिवसेना माझ्या पाठीशी आहे, असेही ते म्हणाले.