फुग्यात गॅस भरताना फुगेवाल्याचा मृत्यू तर ११ बालक जखमी !

बातमीदार | १६ ऑक्टोबर २०२३

लातूरमधून एक धक्कादायक घटना समोर आली आहे. रविवारी संध्याकाळी लातूरच्या तावरजा कॉलनी भागातमध्ये फुग्यात हवा भरताना गॅस सिलिंडरचा स्फोट होऊन फुगेवाल्याचा मृत्यू झाल्याची घटना घडली आहे.

मिळालेल्या माहितीनुसार, फुग्यात हवा भरणाऱ्या नायट्रोजन हेलियम गॅस सिलिंडरचा भीषण स्फोट झाला. या स्फोटात फुगे विक्रेत्याचा जागेवरच मृत्यू झाला. तर फुगे घेण्यासाठी आलेले 11 लहान मुले देखील गंभीर जखमी झाले आहेत. राम इंगळे (वय 45) असं मयत फुगेवाल्याचं नाव आहे. बीड जिल्ह्यातल्या वाघाळा-राडी येथील तो रहिवासी होता. तो आज फुगे विकत लातूर शहरातल्या तावरजा कॉलनीत आला होता.

मात्र फुग्यात हवा भरतानाचा सिलिंडरचा स्फोट झाला आणि ही दुर्दैवी घटना घडली आहे. जखमी बालकांवर लातूरच्या शासकीय रुग्णालयात उपचार सुरु आहेत. दरम्यान रात्री उशिरा जिल्हाधिकारी यांनी जखमी मुलांची भेट घेऊन विचारपूस केली. अशा अनधिकृत स्फोटक वस्तू घेऊन फिरणाऱ्या फेरीवाल्यांवर तात्काळ सरकारने बंदी घालावी, अशी मागणी जखमी मुलांचे पालक करत आहेत.